كليتي الاثرية

انا ادرس في الكلية العلمية في جدة وفي ناس يسمونها كلية البغدادية ...عشانها في حي البغدادية ..

هذه الكلية ..تتكون من خمس مباني .. كل مبني يقول للثاني : طيح وانا اطيح بعدك !

من جد مباني قديييييييييمة ..من اكثر من 50 سنه يمكن او اكثر ..

الله يعزكم انا كل يوم ادام فيها ... مو كل يوم كل يوم ... انا احب الغيـــــــــــاب..

عندي وجهه نظر وهي كالتالي .. في اجازات رسمية ..فعشان كذا لازم تكون في اجازات شخصية ..

يعني الواحد يرفه عن نفسه ..

نرجع لكليتي ..

اااااااااااااااااه اااااه منك ياكليتي ..

مدري هو محد داري بحالنا ولا محد يبغى يسوي شيء..

ولا هو مافي حل ولا هو تطنيييييش.. ولا لامبالاه ..

انا اول ما دخلت الكيلة ..قلت الحظ ابتسم لي .. بس يوم شفتها ..

كرهت عيشتي اول شهرين ..بس بعدين تأقلمت ...

ابدأ من مبنى رقم (1) ..

هذه مبنى العميدة ..يوم تنقطع المويه ونبغى نوضي نروح مبنى العميدة .. لانه احيان نادرة تكون متوفرة فيه المويه

واحيان نكون كلنا في الهوى سوى ..هذه المبنى متكون من 3 ادوار والرابع مسوينه بمدري ايش .. مو جدار مدري زنك ولا ايش يسمونه حاجة لونها ابيض وفيه كافتيريا مفتريه زي باقي الكليات والجامعات .. الحاجه اذا مايزودون عليها ريال يزودون ريالين ..

بشكل عام مبنى مزبط من تحت معدوم من فوق

نروح لمبنى رقم (2)

هذه مبنى المعامل

وما يدريك ما المعامل ...هذه المبنى ريحته طاااااالعه مواد كيماويه .. ومعاملة لمن اتذكرها ودي استفرغ .. مرة اخذنا محاضرة كاملة كيمياء عضوية وكانت الريحه تصرع ... بعدين اكتشفوا انه كان في جثة بس ميت من يومين ..

ومرة صارت حريقة في رمضان وخرجنا جري وكانوا الاستاذات يقولوا اجلسوا ..!!! نجلس ننشوي يعني

ماعلينا ربكم سترها ونجينا بدون اي اصابات

بشكل عام هذا اخطر مبنى ودايم تصير فيه حرايق ومرررة بشع ومشوه .

جينا لمبنى رقم (3)

مبنى بنات الاحياء والكيمياء

ايش اقول زي كل المباني ...... الواحد تعب من كثر مايشكي

مبنى رقم (4)

مبنى بنات الرياضييات

وفيه كافتيريا هي ثاني واخر كافتيريا في الكليه وهو احســــن مبنى عندنا مدري ليش التفرقه العنصريه

يعني ما يكفي مدلعين بنات الرياضييات بمواد اقل ومحاضرات اقل كمان مبنى اجدد بس تراه عادي اسمه جديد وليس اثري

مبنى رقم (5)

مبنى بنات الفيزياء

وهو اخر مبنى في الكلية وابعدها .. فيه اصلاحات كثيييير وفيه معامل بالدور الاول مرة انحرقت قبل 3 او 4 سنين

خلصنا ..

نجي لملحقات الكليه ..

مصلى ..

الخاله المسؤوله عنه ,,صوماليه,, لسانها طويـــــــــل تطردنا طرد !

في عز الحر تسكره عننا ... وين نروح يعني ..

بعدين جده جوها مرررررررررة صعب

نتكلم عن الامن ..

بس شاطرين في مخالفات اللبس والجوالات ..

الصياعه اللي تصير ورى عند مبنى المعامل محد يشوفها

بعدين المفروض في الحر ما يكلمونا نلبس اللي نبغى .. بس طبعا في حدود .. اكتشفت ان البنات ما ينعطون وجه

المهم هذه جزء بسيــــــــــــــــــط عن كليتي الاثرية ..واتمنى اني ما اكون جبتها على الجرح

وسلام